Ilaahay nasahnaa oo korreeye wuxuu yidhi:-"(Xusuuso Nabi Muxamadow) markuu kor yeelay (Nabi) Ibraahim tiirarka Guriga(Kacbada) iyo (Nabi) Ismaaciil (iyagoo odhanaya) Rabbiyow naga aqbal annaga, adigaa waxna maqla waxna oge.Rabbigayow naga yeel annaga kuwo kuu hoggaansan adiga, tafiirtayadana ummad (ka yeel) kuu hoggaansan adiga, nana tusi camalkayaga (Xajka), nagana toobad aqbal adigaa toobad aqbal badane, wanaag badanena ah. Rabbigayow u soo bixi Rasuul iyaga ka mid ah oo u akhriya aayaadkaaga, barana Kitaabka (Quraanka) iyo Xigmadda(Sunnada Rasuulka ) oo nadiifiya adigaa adkaade, falsme ahe" Suradda Al-Baqara aayadaha 127--129aad.

Sida ka sugnaatay Xadiisyada Nabigeenna naxariis iyo nabadgalyo Eebbe korkiisa ahaataye intii aanu Nabi Ibraahim naxariis iyo nabadgalyo Eebbe korkiisa ahaataye aanu Kacbada dhisin waxay ahayd goobta ay hadda ku taalo meel bannaan, sida ay Xadiisyadaasi innoo caddaynayaanna Nabi Ibraahim naxariis iyo nabadgalyo Eebbe korkiisa ahaataye oo ay la socdaan xaaskiisii Haajara iyo wiilkeedii Ismaaciil naxariis iyo nabadgalyo Eebbe korkiisa ahaataye ayaa yimid halka ay hadda Kacbadu ku taallo oo ahayd meel bannaan, intuu halkaasi dajiyay ayuu uga tagay qarbad yar oo ay biyo ku jiraan iyo woxogaa timir ah markaasuu uga dhaqaaqay halkii uu markii hore ka yimid, intay Haajara ka daba tagtay ayay ku tidhi xaggeed meeshan cidlada ah nooga tagaysaa ,lamuu hadline socodkiisii ayuu iska sii watay, dhawr jeer markii ay ku celisay ayay markii dambe ku tidhi ma Ilaahay baa kugu amray inaan meeshan nagaga tagto ,markaasuu haa ku yidhi,markaasay ku tidhi haddaa Ilaahay na dayici maayee iska tag, muddo markii ay meeshaa cidlada ah keligood joogeen ayay timirtii iyo biyihiiba ka dhammaadeen, ilmihiina ka gaajooday naaskiina uu caano keeni waayay, ayay Safa iyo Marwa intay dhexdooda toddoba jir kolba dhinac u guclaysay iyadoo kolba mid figta iskaga taagaysa jeedaalinaysana bal dad inuu meelaha uga muuqdo, iyadoo sidii ay ayay markii dambe waxay aragtay meeshii lugaha wiilka yar ku beegnayd oo biyo ka soo burqanayaan,intay wiilkeedii yaraa u timid ayay biyihii gacanta saartay oo ay tidhi:-(Simmii Simmii oo ah dega dega) , Rasuulkeenuna naxariis iyo nabadgalyo Eebbe korkiisa ahaataye wuxuu yidhi:-"Haddii aanay odhan lahayn Simmii Simmii(joogsada joogsada) waxay noqon lahaayeen wabi qulqulaya" ,muddo markay daganayd ayaa waxaa soo ag maray reero ka tirsanaa qabiilka Jurhum la odhan jirey oo dhulka Yaman ka soo hayaamay, intay u yimaadeen ayay kula heshiiyeen inay u wehel yeelaan oo ay la dagaan biyahana la wadaagaan, sidii bayna yeeshay, halkaasuu Nabi ismaaciil naxariis iyo nabadgalyo Eebbe korkiisa ahaataye oo ku barbaaray kuna bartay luqada Carabiga, markii uu waynaadayna suldaankii qabiilada Jurhum ayuu gabadhiisii guursaday. Waa dambe ayuu Nabi Ibraahim naxariis iyo nabadgalyo Eebbe korkiisa ahaataye u yimid, markaasuu ku yidhi:- "Aabbo Ismaaciilow Ilaahay amar buu i faray", markaasuu Ismaaciil ku yidhi:-"Samee (Aabbo) wixii Ilaahay ku faray?", markaasuu (Ibraahim) yidhi:-"Oo ma igu gargaari?",haa buu yidhi(Ismaaciil), markaasuu yidhi (Ibraahim):-"Ilaahay wuxuu i faray inaan halkan ka dhiso guri(lagu cibaadaysto)", intuu u tilmaamay taag yara dheer hareerihiisa.Markaasay rukumadii u taageen gurigii isago Nabi Ismaaciil naxariis iyo nabadgalyo Eebbe korkiisa ahaataye uu dhagaxaanta u soo ururinayo Nabi Ibraahim naxariis iyo nabadgalyo Eebbe korkiisa ahaataye uu dhisayo, markii uu dhismihii dheeraadayna dhagax uu ku joogsado ayuu u keenay kaasoo noqday Maqaaqka Ibraahim, isagoo Nabi Ismaaciil naxariis iyo nabadgalyo Eebbe korkiisa ahaataye uu u soo dhiidhiibayo dhagaxaanta Nabi Ibraahimna uu dhisayo ilaa ay ku soo wareegeen guriga iyagoo odhanaya:"Rabbiyow naga aqbal annaga, adigaa waxna maqla waxna oge".