U shaqayso hoygaaga dhabta ah

Beri hore ayaa waxaa magaalo xukumi jiray boqor, waxaana dadka magaalada deggen caado u ahaa inay sannad kasta doortaan boqor, marka uu sanadkaasi dhammaadana intay dhar qurux badan u xidhaan, maroodin saaraan ayay magaalada ku soo wareejin jireen, iyagoo nabadgalyaynaya, waxaanay saari jireen dooni iyagoo gayn jiray gasiirad cidla ah, halkaasoo ay kaga soo noqon jireen halkaasoo uu inta noloshiisa ka hadhsan ku dhammaysan jiray, waxaana ay markaa dadka magaaladu dooran jireen boqor kale oo sannad xukuma dabadeedna gasiiraddaasi loogaga soo tago sanad kadib. Maalin maalmaha ka mid ah ayaa markii boqor ka mid ahi boqoradii uu sanadkii u dhammaaday ayaa sidii caadada ahayd inta dhar qurub badan loo xidhay oo maroodi wayn la saaray magaaladiina lagu sii wareejiyay doonidii hoyn lahayd xaggeedii loo gudbiyay , markaasuu isagoo dhaqaaq joogsanaya kolba gadaal u soo eegaa dadkan shalay ka saxeexay na xukun maantana meel aan cidi ka warhayn inta cimrigiisa ka hadhsan u galbinaya, laakiin waa heshiis lala galaye loogama jimcin, doontii inta la saaray ayaa ilaa intay ka libdhaysay loo sii gacan haatiyay. Markii ay doonidii boqorkii ku soo dejisay gasiiraddii cidlada ahayd dhexdana ay ku soo jirto ayaa waxay badmaaxyadii saarnaa la kulmeen dooni wax yar ka hor degtay iyo wiil dhallinyaro ah oo ka badbaaday loox ka jabay doonidii degtayna ku dadaalaya sidii uu ugu badbaadi lahaa ayaa intay soo badbaadiyeen waxay keeneen magaaladii, waxaana dadkii magaaladu ay ku tashadeen in wiilkan dhallinyarada ah loo sharaxo sanadkii boqortimada isagii ayaana loo bandhigay, markii hore diid laakiin markii dambe ayuu oggolaaday maadaama ay dadka magaalada deggen qaarkood soo badbaadiyeen waxaase loo sheegay in 12 bilood kaddib loo qaadi doono gasiiraddii cidlada ahayd ee la geeyay boqorkii isaga ka horreeyay iyo kuwii kale ee ka sii horreeyayba.

Saddex cisho markii uu boqor ahaa ayuu wasiiradiisii amray in la geeyo gasiiraddan loo tarxiili jiray boqoradii isaga ka horreeyay muddada uu xukunka hayaa marka ay dhammaatana isaga loo tarxiili doono, wasiiradii amarkiisa ayay fuliyeen markaasaa isaga, wasiiradiisii iyo ciidamo ilaalo ahaa oo la socday ay markii u horraysay cagaha dhigeen gasiiraddan boqorada lagu tuuri jiray ee aanay cidiba cag dhigin, markii uu cagaha dhigayba mise waa bahalo dad cun ah oo meel kasta ka ciyaya iyo lafihii boqoradii isaga ka horreeyay oo meel kasta daadsan, wuxuu ogaaday in markii boqor kasta la keeno ay bahalani kala goosanayeen, waxaa kale oo uu arkay in gasiiraddu ay kayn jiq ah tahay. Dib ayuu u soo noqday markaasuu 100 shaqaale ah si hoose ugu diray gasiiraddaas si ay bahalada uga laayaan geedahana uga jaraan meelo laga dego gasiiraddaasi, bil markii ay hawshaasi socotay ayuu booqday waxaanu arkay inay gasiiraddii noqotay meel la degi karo, haddana waxa uu shaqaalahii amray inay beero iyo bustaano ku abuuraan isla markaana xoolaha la dhaqdo geeyaan sida loda,adhiga,digaaga iyo xayaawanada kale ee dabjoogta ah. Bishii saddexaadna waxa uu shaqaalihii ku amray inay guri wayn uga dhisaan isla markaana deked yar oo ay doonyuhu ku soo xidhaanna ay ka sameeyaan, ilaa shan bilood markii ay shaqaalihii ka shaqaynayeen ayay gasiiraddii isku baddashay meel qurux badan oo naftu jeclaysato inay degto. Boqorku fariid ayuu ahaaye intii uu magaalada joogay dhar caadi ah ayuu xidhan jiray cunto yar oo ku fulinna wuu ka cuni jiray hantida soo gasha inta kalana gasiiradda ayuu galin jiray. Sagaal bilood markii ay dhammaatay ayuu wasiiradiisii shiriyay waxaanu u sheegay inay arrintu tahay inuu 12 bilood kaddib gasiiradda loo qaadayo, laakiin waxa uu u sheegay inuu isagu doonayo inuu hadda u guuro gasiiradda, hase yeeshee wasiiradii waa ay ka diideen waxayna u sheegeen in sidii heshiisku ahaa saddex bilood kabacdi xagga gasiiradda loo rari doono, sidii buuna ku qancay.

Sannadkii ayaa dhammaaday kalkii boqorka gasiiradda oo galbin lahaa ayaana la gaadhay, sidii caadada ahaydna dhar qurub badan ayaa loo xidhay boqorkii maroodi waynna waa la saaray si magaalada loogu soo wareejiyo iyadoo dadku ay waddooyinka safnaayeen iyaoo gacmaha u taagaya oo ku leh nabadgalyo boqorow....nabadgalyo boqorow, hase yeeshee halka ay boqoradii hore iyagoo murugaysan dadku sagootin jireen waxay arkeen boqorkan dhallinyarada ah oo isagu faraxsan qoslayana waxayna waydiiyeen sababta uu isagu u faraxsan yahay waxaanu ugu jawaabay murti ay indheergaratadu ku yidhaahdeen:-" Marka aad dhalato waad oydaa iyadoo dadka ku hareero taaganna wada qoslayaan markaa ugu noolow adduunka sidii aad doonto ilaa inta aad ka dhimanayso markaas oo aad adigu qosli doonto dadka ku hareera joogaanna ay wada ooyi doonaan", markaa boqoradii iga horreeyay waxay ku mashquulsanaayeen intii ay xukunka hayeen sidii ay naftooda uun ugu raaxayn lahaayeen, aniguse waxaan ka fikirayay mustaqbalka iyo sida xaal noqon doono taasoo keentay inaan gasiiraddii ka dhigo meel la degi karo si aan inta cimrigayga ka hadhsan aan si raaxa leh ugu noolaan lahaa.

Haddaba akhristow ujeedada ma ila garatay. Haa baan u malaynayaaye adduun yuu ku hodine aakharadaada iyo hoyga dhabta ah ee aad degi doonto u shaqayso.Ilaahay ha ina waafajiyo sida khayrku ku jiro, khaatumadana Ilaahay ha innoo wanaajiyo..Aamiin. 

hilinkatoosan.com