Malakal Mawtku muxuu kugu odhan?

Ina Aadanow marka aad dhimato ee sariirta lagugu maydhayo lagu saaro muxuu kugu odhan Malakal Mawtku? Intuu kuu dhawaaqo ayuu kugu odhan.........

Aaway maqalkaagii maxaa ku dhago tiray.

Aaway aragaagii maxaa ku indho tiray.

Aaway carrabkaagii maxaa ku aamusiiyay.

Aaway urtaadii wanaagsanayd maxaa ku baddalay.

Aaway xoolahaagii maxaa ku caydheeyay.

Marka qabriga lagu dhigo ayuu haddana Malagu kuu dhawaaqi isagoo ku leh........

Ina Aadanow adduunyo ma ururisay mise adduunyo iyadaa ku ururisay.

Ina Aadanow adduunyo ma ka tagtay mise aduunyo iyadaa kaa tagtay.

Ina Aadanow ma u diyaargarawday dhimasho mise geeri baa kugu kadisay.

Ina Aadanow waxaad ka soo baxday ciidda waxaadna ku soo noqotay ciiddii.

Waxaad ka soo baxday ciidda adigoo bilaa dambi ah waxaadna ku soo noqotay ciiddii adigoo gabigaaguba wada dambi ah.

Marka ay dadkii kaa soo tagaan ee habeenkiina soo horyeesho , ayna kuu bilaabato habeenkii koowaad oo subixiisu noqon doono maalinta Qiyaame, habeen aan subaxeeda Eedaan jirin , aanu mu'adinku odhanaynin Salaad u kaalayay waayo Salaad iyo Cibaado way dhammaatay , waxaa subaxaa yeedhi doona Suurtii Israafiil oo odhanaysa

Lafayohow duugoobay,hilbayohow kala filqay.

U kaca is hortaagga maxkamaddii Rabbiga Caalamiinta oo dhan ah.

Ilaahay korree oo nasahnaaye wuxuu yidhi:-"Suurta ayaa la afuufaa, markaasaannu ururinnaa ururin", waxaa kale oo uu Eebbe korreeye yidhi:"Waannu ururinnay kamaanaan tegin iyaga midna". Habeenka kuugu horraysa ee aad qabrigaaga u hooyato ayuu boqorkii boqoradu, Ilaahay korree oo nasahnaaye kuu dhawaaqayaa wuxuuna kugu odhanayaa:-

Ina Aadanow way kaa tageen oo ay kaa noqdeen

Ciidda dhexdeeda ayayna kugu aaseen

Hadday kula joogaan waligoodna waxba kuumay tareen

Cid aan Aniga ahayn oo kuu hadhayna ma jiro,

Aniguna noole aan dhiman baan ahay

Ina Aadanow kii Ilaahay qoorta u raariciya kor buu u qaadaa, kii is wayneeyana hoos buu u dhigaa

Addoonkayow waad na oggolaatay waanannu ku soo dhawaynay

Waadna na caasiday oo waannu kuu kaadinnay

Haddaad noo soo noqoto intaa ka bacdina waannu kaa aqbalnay

Aniga,Insi iyo Jinniba arrin wayn baa na dhexyaala

Waan abuuray cid aan Aniga ahayna wuu Caabudayaa

Waan quudinayaa cid aan Aniga ahaynna wuu u mahadnaqayaa

Khayrkayga ayaa addoomada u soo daadaga sharkoodaana ii soo kora

Waxaan isku jeclaysiiyaa nimcooyinkayga, Anigoo iyaga ka kaaftoon

Waxay isku kay nacsiiyaan macsiyooyinkooda, iyagoo ah waxa ugu baahi badan agtayda

Ka ii soo noqda iyaga meel dhaw baan uga yeedhaa

Ka iga fogaada iyagana meel fog baan uga yeedhaa

Kuwooda xuska badan ayaa Cibaadadayda guta

Kuwooda ii mahadnaqa ayaa kordhiskayga hela

Kuwooda i yeela ayaa jacaylkayga hela

Kuwooda i caasiya kama quusiyo naxariistayda

Hadday ii soo noqdaan Xabiibkooda ayaan ahay, anigu waan jecelahay kuwooda soo noqda , waanan jecelahay kuwooda is daahiriya

Haddaanay ii soo noqonna dabiibkooda ayaan ahay

Waxaan ku ibtileeyaa musiibooyin si aan uga daahiriyo dambiyada iyo macsiyooyinka

Wanaaggu agtayda waa toban laab waanan ka sii kordhiyaa

Xumaantuna waa iyadoo kale waanan dhaafaa

Anigu waan ugu naxariis badanahay addoomadayda sida hooyo wiilkeed.

hilinkatoosan.com