|
2-Sawiro
ka sheekaynaya dilkii Culimadii Soomaaliyeed ee runta ka sheegay
sharcigii dhaxalka ee ay dawladdii milateriga ahayd ee uu madaxwaynaha
ka ahaa Maxamed Siyaad Barre ay ku soo rogtay dalkii Soomaaliya.
Dilkii
Culimadan sawiradoodu kor ka muuqdaan iyadoo lagu fulinayo dilkii
bahalnimada ahaa ayaa ay go'aamisay maxkamaddii milateriga ahayd ee u
samaysnayd tirtiridda sharafta iyo milgaha umaddu lahayd ee ku aroorayay
Diinta Islaamka ah ee ay 100% dadka Soomaalida ahi aaminsan yihiin.
Maxkamaddaasi waxay dhacday maalin Sabti ah bisha Muxarramna ay ahayd 6
sanadkii 1395kii taariikhda Hijriyada, taasoo ku beegnayd 18kii bishii
January sanadkii 1975kii. Culimadaas oo laga qabqabtay Masaajidada
magaalada Muqdishu Salaaddii Jimcada ee maalinimadii ka horaysay
maalintaa ay maxkamaddu dhacaysay.Xukunkaasina wuxuu u dhignaa
sidani:-"Maxkamadda Badbaadada Qaranku waxay ku xukuntay lix ka mid ah
culimada ka hor yimid xeerarkii ay xukuumadda kacaanka ahi soo saartay
dil toogasho ah, waxa kale oo ay maxkamaddu ku xukuntay saddex ka mid
culimada 30 sano oo xadhiga ah, laba kalana waxay ku xukuntay 20 sano oo
xadhig ah".
Maalinimadii Axadda ee ay bisha Muxarram ahayd 7da sanadkii
1395kii , taasoo ku beegnayd 19kii January 1975kii waxay maxkamaddii milaterigu
soo saartay go'aan kale oo u dhignaa sidan:-"Maxkamaddu waxay ku xukuntay 4 ka
mid ah culimada dil toogasho ah,markii ay ka hor yimaadeen xeerarka cusub iyagoo
isku qarinaya huga Diinta Islaamka, 3 kalana waxay ku xukuntay 30 sano oo xadhig
ah, 15 kalana 20 sano oo xadhig ah".
Subaxii Khamiiseed ee ay bisha Muxarram ahayd 11ka sanadkii
1395kii, kuna beegnaa 23kii January 1975kii ayaa Idaacaddii Raadiyow Muqdishu
laga sii daayay war argagax iyo cadho ku beeray shacabkii Soomaaliyeed, inkastoo
aanay wax fal ah oo ay kaga hor tagayaan arrintaasi aanay waagaasi qaadin
haddana qof kasta meel uu joogayba hoos u foorarsay.Warkii Radio Muqdishu sii
daayay oo aad u koobnaana waxa uu u qorraa sidatan:-"Sida ay sheegayso
wakaaladda wararka Soomaaliyeed ee SONNA waxaa saaka subixii dil toogasho ah
lagu fuliyay 10kii qof ee ay maxkamadda badbaadada qaranku ku xukuntay dilka ,
waxaana lagu toogtay oo dilkaasi lagu fuliyay garoon u dhaw dugsiga booliska ee
ku yaala xeebta badda, magacyadooduna waxay kala yihiin:-
1-Sheekh Axmed Sh. Maxamed
2-Sheekh Muuse Yuusuf
3-Sheekh Axmed Iimaan
4-Cali Xasan Warsame
5-Xasan Ciise Iley
6-Maxamed Siyaad Xirsi
7-Cali Jaamac Xirsi
8-Aadan Cali Xirsi
9-Saleebaan Jaamac Maxamed
10-Yaasiin Cilmi Cawil
Maxkamadda badbaada qarankuna waxay ku eedaysay
dambiilayaashaasi horteedana ay kaga caddaatay in 10kaas eedaysane ay si wadajir
ah uga hor yimaadeen xeerkii ay sida wadajirka ah iskugu raaceen kana soo baxay
golaha sare ee kacaanka, iyo golaha wasiirada 11kii January sanadkii
1975kii, kaasoo ku saabsanaa sinnaanta ragga iyo dumarka, waxa ayna maxkamaddu u
cuskatay xeerka lambarkiisu yahay 12 qodobkiisa 54aad ee soo baxay 10kii bishii
9aad sanadkii 1970kii".
Ilaahay ha u naxariisto culimadaas Shuhadada ah ajarkoodana
Ilaahay innagama xarrimo. Aamiin.....Aamiin.
Xigasho:- Buugga la yidhaahdo Soomaaliya iyo xididada dhibaatada haysata ee uu
qoray Dr. Cali Sh. Axmed Abokor.
F.G.Taariikhda Shuhadadii Muqdisho
haddii aad hayso na soo gaadhsii mid ka mid ah xaattaa haddaad hayso.
Mahadsanidiin.
|
