بسم الله الرحمن الرحيم

Ilaahay nasahnaa oo korreeye waxaa uu Quraankiisa ku yidhi isagoo innooga sheekaynaya Nabiyadii uu soo diray iyo umaddihii hore ee uu u soo diray  iyo ujeedada ay tahay inaynu ka qaadanno:-"Annagaa u waxyoonay xaggaaga sidii aanu ugu waxyoonay xagga (Nabi) Nuux iyo nabiyadii ka dambeeyay, waxaa kaloon u waxyoonay xagga (Nabi) Ibraahim iyo Ismaaciil iyo Isxaaq iyo Yacquub iyo Caruurtiisii iyo Ciise iyo Ayuub iyo Yuunus iyo Haaruun iyo Sulaymaan, waxaanan siinay Daa'uud Zabuur. Iyo Rasuullo aannu kaaga sheekaynay horay iyo Rasuullo aanaan kaaga sheekayn adiga, wuxuuna la hadlay Ilaahay (Nabi) Muuse hadal. (Waana) Rusul bishaarayn oona digi si ayan ugu yeelan dadku Ilaahay xujo kaddib Rususha, wuxuuna ahaaday Ilaahay adkaade falsan" Suuradda An-Nisaa'i aayadda 163--165.

Isla markaana ka shidaal qaadanayna Xadiiskii uu Rasuulkeennu naxariis iyo nabadgalyo Eebbe korkiisa ahaataye uu ku yidhi:-"Waxaa u khayr badan qarniyaasha (facyaasha) qarnigayaga,markaasna kuwa ku sii xiga,markaana kuwa ku sii xiga"

Haddaba si aynu wax uga ogaano taariikhihii hore iyo kuwan dambeba aynu u kala qaadno taariikhihii hore oo ay hoos imanayaan Nabiyadii Ilaahay naxariis iyo nabadgalyo Eebbe korkooda ahaataye,laga soo bilaabo aabaheen Nabi Aadan naxariis iyo nabadgalyo Eebbe korkiisa ahaataye ilaa laga soo gaadhayo Nabigeennii Muxamed ahaa naxariis iyo nabadgalyo Eebbe korkiisa ahaataye iyadoo ay soo dhex galayaan umadihii Nabi kasta loo soo diray.

Iyo Taariikhda cusub oo aynu ka soo bilaabi doono dhalashadii Nabigeenna naxariis iyo nabadgalyo Eebbe korkiisa ahaataye,sidii uu Waxyigu ugu soo degay,faafintii diinta Islaamka, asxaabtii Nabiga , dagaaladii uu Nabigu nnEka galay,bilawgii dhismaha dawladdii Islaamka, Khulafaa'u Raashidiinkii,faafitaankii Islaamka ee daafaha dunida,   Taabiciyiintii, culimadii Islaamka,boqortooyoyinkii muslimiinta ilaa laga soo gaadho burburkii boqortooyadii Cismaaniyiinta.

Iyo qaybta u dambaysa oo la socota taariikhda cusub balse ka soo bilaabmaysa qarnigii tagay horraantiisa,iyo waxyaalihii uga waawaynaa ee dhacay innagoo u badin doona taariikhdii Soomaalida sidii gumaysigu ku qabsaday, halgankii ay soo galeen ilaa laga soo gaadho waayaha aynu hadda ku jirno.Markaa akhristayaasha waxaan ka codsanaynaa inay noo soo gudbiyaan wixii la xidhiidha taariikhda Soomaalida.