بسم الله الرحمن الرحيم 

Walaalayaal halkani waxaad ka baran doontaan tafsiirka Quraanka Kariimka ah oo ay culimada Soomaaliyeed halkan idiinka soo jeedin doonaan, waxaanannu haddii Eebbaha awoodda lihi innoo oggolaado aannu halkan idiinku soo gudbin doonnaa kuwa ugu caansan culimada Soomaaliyeed.

laahay Korreeye wuxuu yidhi:-"Kan is duuduubayow (Nabiyow), Istaag habeenka (Tuko oo Cibaadayso) in yar mooyee,Badhkii (tuko oo Cibaadayso) ama ka yaree wax yar,ama ka kordhi, una akhri Quraanka si degen (oo fiican)" Suuradda Al-Musammil Aayadda 1---4aad.

Nabigeenuna naxariis iyo nabadgalyo Eebbe korkiisa ahaataye waxaa laga wariyay inuu yidhi:-"Waxaa lagu yidhaahdaa akhriyaha Quraanka akhri oo kor(Sallaanka kor u kor) una soo dareeri sidii aad adduunkii ugu dareerin jirtay, heerkaaga (darajadaaduna) waa aayadda ugu dambaysa ee aad akhrido(inta aayadood ee aad akhrido ayuu heerka aad Jannada ka gaadhaysaa noqonayaa)".

Quraankuna waa dastuurkeennii iyo hagaheennii inta aynu adduunyada joogno, aakhirana darajada la kala gaadhayaa waa qof waliba sida uu adduunka ugu dhaqmi jiray, una akhrin jiray uguna dadaali jiray,marka uu addoonku ka dheelmado adduunkana qofka Quraanka la saaxiibka ah waxaa gacanta qabta Quraanka oo meel kastana mariya, isagaana u shafeeca qaada addoonkaas.Haddaba walaalkayow Ilaahay nasahnaa oo korreeye ha ina garansiiyee aynu Quraanka adduunka wehel uga dhigano si uu wehel innoogu noqdo aakhiro.