Muqdishu:-Dalladda culumada Soomaaliyeed ayaa fal dambi ah oo gaadhsiisan gaalnimo ku tilmaamay qof kasta oo qof Muslim ah u gacan geliya cadow isagoo dhaqaale ku raadsanaya.Bayaan ay soo saartay dalladda culimada ayaa ka dambeysay kaddib markii todobaadkii hore labo wadaad ay kooxo afduub ahaan uga ka xeysteen gurigooda oo xaafadda SOS ku yaala iyadoo la sheegay in loo gacan geliyay dowlado shisheeye, waxaana la sheegayaa in labada nin mid ka mid ahi uu ahaa meyd.“Ma banaana in qof Muslim ah la waxyeeleeyo naftiisa iyo maalkiisa, dadka Muslimiintun waa walaalo” ayaa lagu yidhi bayaan ay soo saartay dalladda culumada Soomaaliyeed oo uu ku saxiixnaa ku simaha guddoomiyaha dalladda culumaa’udiinka Soomaaliyeed Sheekh Nuur Baaruud Gurxan.Culimada ayaa ku sheegay bayaankooda inay tahay dambi gaadhsiisan gaalnimo qof Islaam ah oo loo gacangeliyo  cadawogiisa isagoo dhaafsanaya hanti aan qiimo laheyn.Bayaanka ayaa looga hadlay arrimaha keenista ciidamo shisheeye ee dalka iyo qodobo ka mid ah Axdi Qarameedka DKMG ah ee la doonayo in lagu soo dhiso magaalada Nairobi.Bayaanka ayaa  si aad ah loogu dhaliilay qodobo ka mid ah Axdi Qarameedka ee dowladda mustaqbalka Soomaaliya loogu soo dhisiyo Mbagathi.

Xigasho:-Bogga hornafrik.com

Shirka Soomaalida ee Nayroobi

Maxaa cusub?

Dhinaca kalena, waxaa maanta safaaradda Talyaaniga ee magaalada Nairobi lagu qabtay shir ay wada jir u lahaayeen waddamada daneeya arrimaha Soomaaliya, xubnaha dowladaha IGAD ee shirka Soomaalida iyo guddiga loo bixiyey Guddiga Fududeynta Maamulka Shirka Soomaalida oo qabaa'ilka Soomaaliyeed ay u soo dorteen in ay hagaan shirka Soomaalida.

Sida ay sheegeen xubno ku dhow-dhow shirkaasi, waxaa halkaasi looga hadlayaa sidii ay Soomaalidu u hagi lahayd shirka Soomaalida marka la soo doorto xubnaha baarlamaanka oo shir-guddoonka iyo xoghayntuba ay isula shaqeyn lahaayeen. Guddigani waxa ay hawshiisu ku ekaan doonaa ilaa shirka uu dhammaanayo oo xildhibaannada la dhaariyo, madaxweynaha la doorto, dabadeedna la soo laabo guud ahaan gogosha shirka Soomaalida.

 Xigasho:-Bogga BBCda ee www.bbcsomali.com

Muranka Puntland

Xigasho:-Bogga Puntlandpost.com 

Baaq Salaadiinta Soomaaliland ay soo saareen

Hargaysa:-Madaxdhaqameedyada Sare ee Beelaha Somaliland ayaa markii u horreysey bayaan wadajir ah ka soo saaray shirka Soomaaliya uga socda Mbaghati iyo saamaynta uu ku leeyahay Somaliland.

Bayaankaas oo ay saxeexeen 25 Salaaddiin iyo Boqorro isugu jira, isla markaana xalay saxaafadda soo gaadhey, waxay madax-dhaqameedyadu ku socodsiiyeen Guddiga Farsamada IGAD ee Shirka Kooxaha Somaliya, fadhigooduna yahay Nayroobi, Dowladaha ku bahoobey Ururka IGAD iyo xubnaha beesha Caalamka ee ku hawlan shirkaas. Waxayna ku tilmaameen inay ujeedadu tahay inay Bulshada Somaliland iyo beesha Caalamkaba u caddeeyaan khatarta shirka Nayroobi ka soo fool leh iyo cawaaqibxumada ka iman karta hirgelinta go’aamada shirkaas iyo inay iftiimiyaan majaraha shirka ay ku hagayaan IGAD iyo Beesha Caalamku.

Bayaankan oo ay odayaashu baaq dhawr qodob ah ugu soo jeediyeen Shirka iyo cidda maamulaysa, isaga oo dhammaystiran wuxuu u qoran yahay:

“HORDHAC: - Sida la wada ogsoon yahay dalka Jamhuuriyadda Somaliland wuxuu soo maray marxaladaha kala ah:

1. Somaliland Protectorate 1884-1960
2. Xorriyaddii iyo la midowgii Soomaaliya 1960-1990
3. Jamhuuriyadda Somaliland 1991-2004

Arrintu si kasta ha ahaatee, Jamhuuriyadda Somaliland mudadaasi waxay ku taabo-qaadday markay u qabsoomeen arrimahani:

1. Sugidda Nabadgelyada Dalka
2. Maamul dhisid iyo kala dambaynta
3. Aftida Dastuurka Qaranka
4. Doorashooyinkii degaanka iyo Madaxtooyada

Tallaabooyinkaas oo dhan Jamhuuriyadda Somaliland waxay u dhabar adaygtay hirgelintooda si ay u xaqiijiso masiirka ummaddeeda oo ay ku hirgeliso dimoqraadiyad dhab ah, si ay uga hesho beesha caalamka aqoonsi una hanato maadaama ay buuxisey shuruudihii looga baahnaa.

Waxase wax lala yaabo ah in beesha caalamka iyo IGAD ay mareen majarayaal khaldan oo ay intoodii badnayd ku fashilmeen sida (Hawlgaladii iyo shirarkii):

· UNISOM
· Shirkii Qaahira,
· Shirkii Addis Ababa,
· Shirkii Carta, Iwm.

Kuwaasi oo dhammaantood ku liddi ahaa qaranimada iyo jiritaanka Jamhuuriyadda Somaliland, shirkanina waxba kagama duwana kuwii hore, iyadoo uu dheer yahay shirqoollo badan oo la adeegsanayo.

NUXURKA SHIRKA NAYROOBI:

1. DASTUURKA:

Dastuurka lagu sameeyey shirka Kenya oo xadgudub ku ah qaranimada Jamhuuriyadda Somaliland, isagoo lagu cadeeyey xuduudaha dalkii loo yaqaanay (Somali Republic), halka beesha caalamka iyo IGAD ay leeyihiin kuma jirto Jamhuuriyada Somaliland.

2. QAYBINTA IYO U GACANHAADINTA IGAD:

Shirka waxa lagu hayaa qayb qaybin iyo u gacan-haadinta bulshada Somaliland sida Salaaddiinta, Siyaasiyiinta, Aqoonyahanada, Axsaabta iyo Ururrada Bulshada, taasi oo ay wadaan xubno IGAD ka mid ah ujeedaduna tahay in lagu burburiyo midnimada iyo wadajirka ummadda Somaliland.

3. XUDUUDAHA IYO QABAA’ILKA:

Haddii ay dowladaha Safka Hore ee IGAD, shirka ay ka wadaan dhexdhexaadinta Soomaalida ay damacsan yihiin si dadban iyo si cadba inay hadoodilaan iskudar Iwm, iyagoo iska indhatiraya xuduudihii caalamiga ahaa ee Lixdanaadkii, ayna u arkaan inay shirka ku wadaan hab-dahsoon iyagoo adeegsanaya sifo Qabiil, ha ku talogalaan IGAD iyo beesha Caalamku in beelaha shirka loo qaybiyey ay degaan NFD (Kenya), Kililka Shanaad (Itoobiya) iyo Jabuutiba, taasina ay sababi doonto in la tuuro xuduudaha la ictirafsan yahay ee hadda jirta, arrintuna isu bedeli doonto xuduudo isir. Ciddii taasi dani ugu jirto ha caddeeyaan mawqifkooda.

4. SIYAASADAHA MAQAARSAARKA AH:

Waxaa ka mid ah af-gobaadsigii ka soo baxay wakiilka Xoghayaha Guud ee Qaramada Midoobey u qaabilsan shirka (Soomaaliya), waxaanu u aragnaa sarbeeb ku salaysan shirqool dibloomaasi ah oo loo macnayn karo “MAANTA IDIN DILIMAYNO EE BERRITO AYAANU IDIN DILEYNAA”. Oo biyo-dhiciisu ahaa marka Dowlad Soomaali oo dhan ku magacaabanoo koonfuraysan la dhiso, lana ictiraafo idinkuna (Jamhuuriyada Somaliland) tihiin shacbi ka mid ah oo aan la aqoonsanayn ayaad wadahadal yeelan doontaan:

BAAQ:

1. Waa in Dastuurka shirka yaalla laga tirtiraa lagana saaraa dhammaan wixii Jamhuuriyadda Somaliland khuseeya.
2. waa in la joojiyaa faragelinta iyo gacan-haadinta bulshada Jamhuuriyadda Somaliland
3. Beesha Caalamka waxaannu uga digeynaa Dhagar-qabayaasha dagaal ee dembiga ka galay bulshada Soomaaliyeed, gaar ahaan Jamhuuriyadda Somaliland inay daadihiyaan. Waxaanu ka codsanaynaa inay horkeenaan maxkamad dhagar-qabayaasha kuwa shirka ku jira iyo kuwa ka maqanba.
4. Wuu ka xeeldheer yahay wadahadalka sida ay u dhigayaan xubno IGAD ka mid ah iyo ciddii la mawqif ahi. Waxa keliya oo la wadahadli karaa Soomaaliya marka beesha Caalamka, IGAD iyo Soomaalida inteeda kale ay qiraan jiritaanka labadii dowladood ee Lixdankii (1960).
5. Beesha Caalamka waxaanu ogeysiinaynaa in aanay Jamhuuriyadda Somaliland diyaar u ahayn dagaal diineed, mid isir, mid dhaqaale iyo mid Siyaasadeed toonna, kana soo horjeeddo wixii xornimada iyo xaquuqda bani-aadamka wax u dhimaya.

Walaalahayaga Koonfureed (Soomaaliya) waxaanu ugu ducaynaynaa in dhibaha colaadeed ee dhexyaalla Illaahay ka dhex qaado nabadna ay ku wada noolaadaan.

GEBAGEBO:

1. Waxaannu ummadda Somaliland u soo jeedinaynaa shacbi iyo xukuumadaba inay si feejignaan leh ula socdaan waxkastoo turunturro ku keeni kara midnimada Somaliland ama dhantaali kara qaranimada iyo horumarka.
2. Beesha Caalamka waxaannu ku bogaadinaynaa dedaalka ay ugu jiraan sidii ay nabad ugu soo dabaali lahaayeen koonfurta Soomaaliya, uguna samayn lahaayeen maamul u gaar ah oo ku eg xuduudkii Soomaaliya iyo Somaliland ee Lixdankii, xaquuqda guudna waa inay u sinnaadaan labada dhinacba.

MAGACYADA SALAADDIINTA SAXEEXAY BAYAANKAN:

1. Suldaan Maxamed Suldaan Cabdulqaadir
2. Suldaan Maxamed Suldaan Diiriye
3. Suldaan Cumar Suldaan Maxamed
4. Suldaan Maxamed Suldaan Xirsi-qani
5. Suldaan Cabdillaahi Suldaan Cali
6. Suldaan Rashiid Suldaan Cali
7. Suldaan Maxamuud Axmed Sheekh
8. Suldaan Ibraahim Jaamac Samatar
9. Suldaan Daahir Aamin Faarax
10. Suldaan Maxamuud Guuleed Mire
11. Suldaan Barre Xaaji Xuseen
12. Boqor Maxamuud Cali Carab
13. Boqor Cismaan Aw Maxamuud
14. Suldaan Xasan Nuur Askar
15. Suldaan Yuusuf Axmed Caddaan
16. Suldaan Maxamuud Xaaji Xuseen
17. Suldaan Axmed Daahir Muuse
18. Suldaan Cabdiraxmaan Qodax Jaamac
19. Suldaan Maxamed Cabdi Cali
20. Suldaan Axmed Cabdillaahi Samaale
21. Suldaan xuseen Ismaaciil Geelle
22. Boqor Ciise Haybe Khayre
23. Suldaan Xasan Axmed Xaddi
24. Suldaan Nadiif Saydh Jibriil
25. Suldaan Iid Gaws

Cabdirisaaq M.Dubbad, Hargeysa

Xigasho:-Bogga Somaliland.org

Doodda Xisbiyada Soomaaliland

Hargaysa:-Saddexda Xisbi iyo Xukuumadda Somaliland ayaa markii u horreysey xalay isku waajahay dood furan (panel discussion) ku saabsan saamaynta uu shirka Mbegathi ee dib-u-heshiisiinta Soomaaliya ku yeelan karo Somaliland.

Dooddaas oo ka mid ah barnaamuj taxane ah uu soo qabanqaabiyey Dr. Xuseen Cabdillaahi Bulxan oo madax ka ah xarun cusub oo lagu magacaabo Xarunta Abuurista Xalka (Centre for Creative Solutions), waxa ka qaybgalay, aragtiyahoodana ka dhiibtey Guddoomiyaha Xisbiga KULMIYE Axmed Maxamed Maxamuud (Siilaanyo), Guddoomiyaha Xisbiga UCID, Faysal Cali Waraabe, Wasiirka Maaliyadda Mudane Xuseen Cali Ducaale (Cawil) oo isagu ka socdey Xukuumadda iyo Cabdillaahi Geeljire oo xisbiga UDUB ah, iyada oo ay dhegeysanayeen dad gaadhaya Boqol qof oo ah aqoonyahanno ka kala socdey Axsaabta, ururrada Bulshada Rayidka ah iyo siyaasiyiin madax bannaan, kuwaas oo iyaguna su’aalo la xidhiidha mawduuca weydiiyey masuuliyiinta axsaabta iyo xukuumadda, isla markaana aragtidooda ku biirinayey doodda.

Dooddani waxay ka dambeysey digniin xisbiyada mucaaridka ah, Salaaddiinta iyo siyaasiyiin madax bannaaniba ay ka bixiyeen saamayn xun ama khatar Somaliland kaga iman karta shirka Nayroobi oo hadda ku jira wejigiisii ugu dambeeyey, natiijadiisana la sugayo bishan July.

Marka laga reebo labada Xisbi ee Mucaaridka ah ee UCID iyo KULMIYE, waxa aan dooddaas uga soo qaybgelin sidii loogu talagalay Xukuumadda Somaliland iyo xisbigeeda UDUB oo aan iyagu weli mawqif adag sida ka salaaddiinta iyo Axsaabta iska taagin arrinta shirkaas Golaha Sharcidejinta oo qorshaha dooddaas ku jirey. Iyadoo sida uu ii sheegay Dr. Bulxan, isla markaana hore loogu sii wargeliyey dhinacyada kale ee dooddaas iska soo horfadhiisanayey lagu martiqaaday doodda Wasiirka Arrimaha Dibadda Somaliland, Marwo Edna Aadan Ismaaciil, Xoghayaha Guud ee Xisbiga UDUB, Mr. Maxamed Ismaaciil Bullaale iyo Guddoomiyaha Golaha Wakiillada Mudane Axmed Maxamed Aadan (Qaybe). Hase yeeshee, xubnahaas midna kama soo xaadirin madasha. Waxaana la sheegay in Edna Aadan ay isla shalay galab u dhooftay Addis Ababa, Itoobiya, Xoghaya Guud ee UDUB iyo Guddoomiyaha Golaha Wakiillada Mudane Qaybe-na ay ka cudurdaarteen inay ka qaybgalaan dooddaas, sida la sheegay sababo caafimaad-darro awgeed.

Markii qaddar nusa-saac ka badan la dhaafay waqtigii loogu talagalay in barnaamujku bilaabmo (7:30 fiidnimo), xubnahaasina aanay weli iman ayaa qabanqaabiyaha, Dr. Bulxan waxa uu soo fadhiisiyey miiska doodayaasha Xoghayaha Siyaasadda ee Xisbiga UDUB, Cabdillaahi Geeljire oo ka mid ahaa dadka dhegeysanayey doodda, si uu u buuxiyo kaalintii Xoghayaha Guud ee xisbigaas, waxayna dooddu u furantay Saddexda Xisbi qaran, balse goor dambe ayaa waxa soo gaadhey Wasiirka Maaliyadda Somaliland, mudane Cawil Cali Ducaale oo isaguna metelayey Xukuumadda.

Mawduuca doodda oo ahaa “saamaynta iyo Cawaaqibka Somaliland kaga iman kara dowlad Soomaaliya loogu soo dhiso shirka Mbegathi ee Nayroobi, Kenya”, isla markaana ah arrin xasaasi ah oo beryahan dambe ku soo kordhay masraxa siyaasadeed ee dalka, isla markaana is-faham la’aan badan dhaliyey, waxay dhammaan dhinacyada ka qaybgalay isku raacsanaayeen in goonni-isu-taagga Somaliland uu yahay go’aan shacbi oo lama taabtaan ah, gorgortanna aan la gelin karin iyo mawqifka guud ee Somaliland ka taagan tahay shirkaas iyo wax ka soo baxa. Hase yeeshee, waxay si weyn ugu kala aragti duwan yihiin saamaynta dowladda Soomaaliya loogu soo dhiso shirkaasi ku yeelan karto Somaliland.

Guddoomiyaha Xisbiga mucaaridka ah ee KULMIYE, Axmed Maxamed Siilaanyo oo hadal dheer ku furay dooddaas waxa uu sheegay in uu ahmiyed weyn siinayo mawduuca laga doodayo oo uu ku tilmaamay mid qaraweyn oo saamaynaya aayaha iyo qaranimada Somaliland, sidaa darteed, hadalkiisu uu noqonayo mid dhaleecayn iyo cambaarayni ay ka madhan tahay, isla markaana aanu ahayn mid xisbi ama dowlad ku foorora sidii hore u dhici jirtey.

Afeeftaas kadibna waxa uu di qota dheer uga hadlay marxaladdihii Somaliland soo martay tan iyo 1991kii markii lagu dhawaaqay goonni-isu-taagga iyo sidoo kale, dedaalkii markasta barbar socdey ee beesha Caalamku ku doonaysey in nabad iyo dowladnimo laga dhaliyo Soomaaliya, kuwaas oo ilaa iyo hadda socda.

“Tan iyo markii aynu la soo noqonay madax bannaanideena waxaynu taagneyn mawqif, mawqifkaas oo ah, anagu haddaanu Somaliland nahay qaranimadayadii oo buuxda baanu la soo noqonay. Laba, dalkayaga waanu u soo halganay, dhiig baannu u soo qubnay, waannu maroorsanay xorriyadayada, hawl badana waanu u soo marnay oo dib mar kale si fudud nooga lumi mayso,” ayuu yidhi Axmed Siilaanyo.

“Ta Saddexaad, Arrimaha ka socda Soomaaliya – iminka iyo markii horeba – arrimo anaga noo yaalla maaha. Dilkooda, burburkooda, is-layntooda, waa dad aanu wada dhalanay, waa dad aanu mandaqad ku wada noolahay oo saamayn way nagu yeelan kartaa dhibaatooyinka ka socdaa. Markaa lama jeclin dhibtaa ee waannu jecelahay inay nabadgelyo ka dhalato, laakiin, shirarkoodu anaga nama khuseeyaan,” ayuu raaciyey.

Axmed Siilaanyo, waxa uu sheegay in Somaliland mudadaas wax badan qabsatay, horumar, dowladnimo ilaa doorashooyin xor ahna ay gaadhey. Taasi waxa uu sheegay in qodobadaa hore ee mawqifka Somaliland ay ku soo kordhisey in marka Soomaaliya nabadgelyo ka dhalato, dowladna ay dhistaan iyada oo laba dowladood oo siman ay yihiin Somaliland iyo Somaliya ay ka wadahadlaan wixii ka dhexeeyey iyo sidii ay wax u wada qabsan karaan, taas oo uu sheegay in caalamku ku qancay.

Axmed Siilaanyo, waxa uu sheegay in Soomaaliya loo qabtay shirar badan, balse dhammaantood aan lagu guuleysan in ay dhexdooda nabadgelyo ka sameeyaan, dowlad tamarisana lagu dhiso. Laakiin, waxa uu sheegay in shirkan hadda ka socda Mbegati uu ka duwan yahay shirarkii hore marka la eego ayuu yidhi dareenka beesha caalamka, dedaalka lagu bixiyey iyo sida wax u socdaan, waxana uu ka warramay in shirarkii hore beesha Caalamka, waddamada gobolka iyo kooxaha laftooduba ay ku kala aragti duwanaayeen, isla markiibana ay fashilmi jireen, tii ugu saamaynta ama taageerada caalamka badnaydna ay ahayd dowladdii Jabuuti lagu dhisay oo loo ogolaaday Kursigii Soomaaliya ee Q.Midoobey, iyadoo aanay dowladda badan oo awood lihi aqoonsanayn. Waxa uu sheegay in shirkan Neyroobi oo socdey muddadii ugu dheerayd ee shir socdo dowladaha caalamku ay u dhan yihiin, isla markaana laga hadhi waayey Soomaalida, iyadoo loo arkay ayuu yidhi Soomaaliya meel halaq galeen ah, laguna khasbayo in dowlad loo dhiso, waxana uu tusaale u soo qaatay in haddii Soomaalida laysu daayo in mar horeba lagu kala yaaci lahaa. Waxa uu sheegay in dhaqaale badani ku baxay shirkaa, dowladda lagu dhisona loola diyaar yahay dhaqaale kale oo badan iyo ciidamo shisheeye.

“Marka aad arrimahaa eegto, waxa isweydiintu tahay oo werwer yeelanaysa ma mawqifkii aynu taagnayn ee ahaa arrinta shirka Imbegati annaga nama khusayso ayaa hirgelaya mise meeshaa wax kale ayaa ka soo baxaya?” ayuu yidhi Axmed Siilaanyo. Waxana uu intaasi ku daray oo uu sheegay in inkastoo caalamku qiray nabadda iyo horumarka iyo dimoqraadiyadda ka hirgashay Somaliland, isla markaana laga reebay shirka Kenya, haddana, dhinaca kale, dastuurka shirkaas lagu sameeyey oo koobaya xuduudihii Soomaaliyadii hore, dareenka caalamka iyo sida wax u socdaan shaki ay leedahay.

“Markaa su’aashii ahayd shirka Nayroobi saamayn ma inagu yeelan karaa, jawaabteedu waa HAA, weliba saamayn weyn oo xun buu inagu yeelan karaa. Waxaynu ka yeelayno iyo waxaynu kaga tashanayno waa meesheeda,” ayuu yidhi Axmed Siilaanyo, waxana uu sheegay inay tahay khalad in aynu is-dhigano oo nidhaahno shuqul inaguma laha.

Guddoomiyaha Xisbiga UCID, Faysal Cali Waraabe ayaa isagu sheegay in dowladda lagu soo dhiso shirka Kenya iyo go’aamada ka soo baxaa aanay khusayn Somaliland, isla markaana ay ku kooban yihiin Soomaaliya.

Faysal Cali Waraabe, waxa uu ka warramay socdaalkii uu ku soo maray dalalka IGAD iyo arrimihii ay ku wadahadleen madaxda waddamada shirka wada. Waxana uu sheegay in Somaliland iyo Soomaaliya loo aqoonsaday laba Maamul (Entity) oo kala duwan, marka xaggaa dowlad laga dhisona ay wadahadli doonaaan Somaliland.

“Shirkaa ka socda Imbegati anagu waxa aanu u aragnaa inuu yahay shir ku kooban Koonfurta Soomaaliya oo aan Somaliland khusayn, shuqulna aanu ku lahayn. Somaliland haddaynu nahay inagu hore ayaynu mawqifkeenna u caddaysanay, waxaynu nidhi anagu dowlad ayaanu nahay, Somaliland ayaa nala yidhaahdaa, qabaa’il yooyootamaya ma nihin. Markaa caalamku mawqifkeennii ayuu qaatay, dibadda ayaana laynooga saaray shirkaa,” ayuu yidhi.

Faysal Cali Waraabe, waxa uu yidhi; “Inagu yaynaan baqdin isgelinin oo aynu dadka ka deyno shugux-shuguxda aynu u garaacayno,” ayuu yidhi.

Hase yeeshee, waxa uu sheegay in loo baahan yahay in laga tabaabushaysto wadahadalka wixii shirkaa ka soo baxa, taas oo uu sheegay in axsaabtu ku heshiiyeen July 2003 iyo sidii loo dhammayn lahaa waxyaabaha ka qabyada ah Somaliland, sida xuduudaha oo la sugo.

Wasiirka Maaliyadda Somaliland, mudane Cawil Cali Ducaale ayaa isaguna sheegay in shirkaasi aanu khusayn Somaliland, haba yaraatee, wax baqdin ah iyo wax saamayn ah oo Somaliland kaga imanaysaana aanay jirin. Waxase uu sheegay in khatartu ay ka iman karto haddii uu xintan iyo ficiltan soo dhexgalo ummadda Somaliland, taas oo uu sheegay inay tahay sababtii ay ku luntay gobanimadii Somaliland 1960kii.

Waxa uu sheegay in dedaal ay xukuumaddu samaysay uu keenay in Somaliland laga reebo shirkaas, laguna koobo Koonfur oo keliya. Waxa uu ku celceliyey in shirkaasi aanu wax dhibaato ah inoo lahayn.

“Dembi ummadda laga galo oo ka weyn in la baqa geliyaa ma jiro,” ayuu yidhi. Waxa kale oo uu ku tilmaamay qof ku jira ‘Khiyaamo Qaran” oo caddaan ah qofka reer Somaliland ah ee yidhaahda “aynu la hadalo qabqablayaasha dagaal ee Soomaaliya.

Ambassador Cawil, isaga oo ka hadlaya wax u dammaanad qaadaya in shirkaasi aanu saamayn ku yeelan Somaliland waxa uu sheegay in 45 waraaqood ay u direen (xukuumad ahaa) dalalka IGAD ee shirkaa gacanta ku haya, kuwaas oo aanu ugu sheegnay ayuu yidhi haddii shirkaas uu inyar oo saamayn ah ku yeesho Somaliland ama dhibaato ka soo gaadho in khasaaruhu wada gaadhi doono gobolka oo dhan, isaga oo ku faanaya halgamayaashii SNM ee ridey taliskii Siyaad Barre.

Mr. Cabdillaahi Geeljire oo isaguna u hadlay UDUB ayaa sheegay in ay gar tahay haddii la yidhaahdo aynu ka foojignaano saamaynta shirkaa inagaga iman karta, sidoo kalena aan loo baahnayn in dadka la baqe iyo cabsi geliyo.

Aqoonyahanno dhawr ah ayaa iyagu fikradahooda ku muujiyey saamayn lama huraan ah oo Somaliland kaga iman karta shirkaas. Dadkaas oo isugu jirey siyaasiyiin iyo Ururrada Bulshada Rayidka ah, waxay tilmaameen in khatarta ay ka werwerayaan aanay ahayn keliya dowlad loo dhiso Soomaaliya, balse dayaca badan ee Somaliland haysta, is-dhigashada iyo talo la’aanta jirtaa ay wiiqi karto awoodda Somaliland iyo iska caabinta shirkaas.

Dr. Bulxan ayaa ugu dambayntii isaguna ku taliyey in loo baahan yahay xaaladdan oo kale in Asxaabta Qaranku ay wada-tashi yeeshaan, talada la ballaadhiyo, dadkana xog la siiyo.

Waxa uu sheegay in Barnaamujkan oo loogu magacdaray CAAWA TALO KEEN toddobaadkiiba la qaban doono habeenka Arbacada, iyada oo laga doodayo hadba mawduuca taagan.

Dooddan oo aad u dheer iyo fikradihii laga dhiibtey intii suurtagal ah iyaga oo dhammaystiran waxaad ka akhrisan doontaan halkan.

Cabdirisaaq M.Dubbad, Hargeysa

Xigasho:-Bogga Somaliland.org