Walaalayaal Ilaahay korreeye wuxuu yidhi isagoo ka hadlaya Nabigiisa naxariis iyo nabadgalyo Eebbe korkiisa ahaataye:-"Kumana hadlo hawadiisa, Isaguna(Quraanku) maahan illaa waxyi loo waxyooday mooyaane, Waxaana wax baray (oo xagga Eebbe ka soo gaadhsiiyay) ku xoog wayn (oo Malaku Jibriil ah),Caafimaad iyo xoogna leh, Abuuriddiisuna egtahay, Wuxuu joogay jihadii sare(Jibriil),Kaddibna u soo dhawaaday kuna soo hoobtay (Nabiga), Intuu uga jirsado Qaanso (xadhigeed) ama ka dhaw,Wuxuuna (Eebbe) u waxyooday Addoonkiisa (Nabiga) wuxuu u waxyooday" Suuradda An-Najmi Aayadaha 3--10aad 

Nabigeenna naxariis iyo nabadgalyo Eebbe korkiisa ahaataye ayay Asxaabtiisii waxyiga ka qori jirey waydiiyeen oy yidhaahdeen Rasuulkii Ilaahayow banii'aadam baa tahay markaa marka aad xanaaqsan tahay miyaanu kaa qoraa, markaasuu isagoo afkiisa sharafta leh tilmaamaya yidhi:-"Haaye qor Ilaaha naftaydu gacantiisa ku jirto ayaan ku dhaartaye kama soo baxo waxaan xaq ahayn "

Haddaba annagoo raacayna hadalkii Nabigeennu naxariis iyo nabadgalyo Eebbe korkiisa ahaataye uu ku yidhi:-" Iga gaadhsiiya xaggayga (dadka) walow Aayadba ha ahaatee" ayaanu haddii Eebbaha awoodda lihi innoo fududeeyo aynu Soomaaliyayn doonnaa kutubta koobaya Xadiisyadii Nabigeenna naxariiis iyo nabadgalyo Eebbe korkiisa ahaataye, markaa walaalkayow adiguna nagal qayb qaado.Haddii Eebbaha awoodda lihi doonana waxaynu dhawrkii wiigba qaadan doonnaa Xadiisyo dhawra oo kitaab kasta ah.